Tristancafe Filipino Columns

Gusto mo bang magkaroon ng drop dead gorgeous sexy body na kagaya ng kay Angel Locsin or Katrina Halili or abs na kagaya ng kay Marc Nelson or Wendell Ramos? Sa mahal ng fee para magpa-member sa mga sosy gyms ngayon or magpa-meso therapy or lipo-suction, malamang mamayat ka nga sa kunsimisyon. Pero dahil ang mga chochal ay kilala sa pagiging maabilidad at mapamaraan under challenging circumstances, narito ang mga paraan to lose weight without losing any single penny.

1. Diet…not!

Alam kong di na bago sa iyo ang mag-diet lalo na kapag malayo pa ang sweldo or Monday pa lang ay ubos na ang allowance mo. Pero alam mo ba na ang mga kumare kong mga supermodels na sina Tyra Banks at Claudia Schiffer ay against sa diet as a way to lose weight?

Bakit mo nga naman ide-deprive ang sarili mo na lumafang? Pipigilan mo ba ang sarili mong kumakin ng pagkasarap-sarap na Chocnut or Kwek-kwek? Basta make sure lang na hindi pampabata ang kakainin mo, as in bata pa lang mamamatay ka na sa dami ng cholesterol at MSG na nilalaklak mo.

Then what is the best way to shed those unwanted fats? Magbanat ng buto at mag-exercise! At paano mage-exercise na hindi na kailangan pang pumunta sa gym, just read on…

2. Sa halip na mag-elevator, mag-stairs na lang.

Kapag nasa mall, office, or school, sa halip na mag-elevator upang pumunta sa ibang floors, magstairs na lang. Kahit na nasa ground floor ka at sa 35th floor ang pupuntahan mo. Kung di ka pa pumayat nyan kahit araw-araw mong ginagawa, tumalon ka na lang sa building para wala ka nang problema.

3. Sa halip na mag-commute, maglakad na lang.

Aba! Marami kang benefits na makukuha dito kung gagawin mo. First, walking is a good form of exercise. Kung ikaw ay maglalakad lang papunta sa iyong paroroonan, para ka na ring nag-threadmill devah? Kesehodang ikaw ay nasa Laguna at ang pupuntahan mo ay sa Pampanga! Mae-exercise na ang mga binti mo, maraming fats pa ang mawawala sa yo! Bongga! Kung halimbawang nasa Pilipinas ka at pupunta ka sa China, eh di lumangoy ka na lang sa China Sea! Take note, swimming is a good form of exercise too! Malay mo madiscover ka pa ng Guinness Book of World Records pag nagawa mo yan! Daig mo pa ang nakaakyat ng Mount Everest! Panalo ang beauty mo!

Second, nakatipid ka pa sa pamasahe. Aba! Magkano din ang minimum fare ngayon! Seven pesos! Isipin mo na lang kung ilang Juicy Fruit at Boy Bawang ang mabibili mo nyan!

Third, makakatulong ka pa sa kalikasan para makabawas sa air pollution dahil sa maruming usok na ibinubuga ng mga sasakyan. Nang sa gayon, may maganda ka namang magagawa sa buhay mo kesa magpaseksi!

4. Habang nanonood ng TV, mag-multi-tasking.

Studies show na ang panonood ng TV ang isa sa mga cause of gaining weight dahil hindi natatagtag ang mga taba mo sa katawan. Kaya kung ikaw ay adik sa TV dahil gusto mong masubaybayan kung magtatagumpay ba si Eliazar para matalo ang Super Twins, or dahil gusto mong malaman kung magkakabalikan ba sila Ruffa at Ylmaz, pwes matutong magmulti-tasking habang nanood ng TV para ma-burn ang mga fats. Halimbawa, magwalis-walis ng sahig habang nanonood ng TV. Or maglinis ng bubong habang nanonood ng TV. Or mag-igib ng tubig habang nanonood ng TV . Kung paano mo gagawin yan, eh problema mo na yan. Basta ang importante, binigyan na kita ng idea. Wag ka namang abusado! Gamitin mo ang kukote mo paminsan-minsan para ma-exercise din noh! Baka kalawangin yan pag di mo ginagamit lagi, ikaw rin!

5. Love your body.

So what kung hindi ka sexy? So what kung parang kalsada sa subdivision ang katawan mo sa dami ng humps? So what kung mukhang belt bag ang puson mo? Nagpapasexy ka ba para sa sarili mo o dahil sa ibang tao? If you want to lose weight due to medical reasons, then well and good because health is wealth. Pero kung nagpapa-sexy ka dahil iiwan ka ng dyowa mo kapag hindi ka nagpa-sexy, or dahil gusto mong makapag-pose someday sa FHM, or dahil gusto mong talbugan sa paseksihan ang bagong gf ng ex mo, or you wanted to be sexy just to please everybody and to meet others’ standards, pwes bakit di mo subukang ipukpok ang dumbell sa ulo mo para matauhan ka naman. If you wanted to lose weight and be sexy, gawin mo dahil gusto mo para sa sarili mo at hindi para sa ibang tao. Do it because you wanted to look good and feel good. Pero kung kuntento ka na naman sa porma ng katawan mo at hindi ka naman insecure, then so be it! Remember, ang pinaka-plus factor pa rin ng isang tao ay ang kanyang personality.

Alalahanin na ang katangian ng isang tunay na chochal ay ang nag-uumapaw na self-esteem at self-confidence. Rumampa sa kalsada as if isa ka sa mga models ng Bench Underwear kesehodang nagba-bounce up and down ang puson mo. At kapag may nagsabi sa yo na meron kang Coca-Cola body, yung 1.5 liters nga lang, yanigin mo sila sa statement na: “Eh kung maganda na nga ako tapos sexy pa ko, eh di masyado na kong perfect nun? Ay ayoko ng ganun, baka mas lalong maraming mainsecure sa kin!”. Pang-Ms. Universe ang statement mo ‘Day! Winner!

Always remember:

Be Bold. Be Proud. Be Chochal.

Filed under: Chochal Rules